Twents

Gemeente Riessen-Hooltn:
'n good eavenwicht tusken röste en beweaging

Gemeente Riessen-Hooltn zeg oe: “Komt d’r in, dan kö-j d’r oet kiekn!”

Oetgestrekte natuur op ene van de meuiste steas van Nederlaand. Honderden joarn oolde en weetnsweardige geschiedenis, mear ook: ne gemeente den ‘t van hooldt van wierigheaid. Bedriewn vuur alns en nog wat dee ‘t de vleugels alverdan vearder oetsloat. Viej goat op ne eagntiedse manere umme met wonn, weenkels en het walbeveendn van al oonze börgers. Vandoar ook: Komt d’r in, dan kö-j d’r oet kieken!

De gemeente Riessen-Hooltn is op 1 januoari 2001 ontstoan toew Riessen en Hooltn biej mekoar zeent egoan. Oonze gemeente lig heel mooi tusken de greune Tweantse leande en de buske van de Sallaandse Heuwelrugge. Oonze 36.500 inwonners wont , woarkt en leawt ‘r plezerig.

Eagntieds zaakn doon
De leu in Riessen-Hooltn zeent eweand um de haande fleenk te loatn wappern. Det kö-j oaweral an vernemn. Ooit warn hier de steenbakkeriejn en de jute- en textielfabriekn en op dee foondemeantn kon nen hoop nieje bedriewn wieter bouwn. En vlakt ook ’n laandbouwsector nit oet! Oondernemmingn dee ’t in eagn laand en doarboetn ne partieje metbloast. Iej hebt bedriewn dee ’t bouwt, vleais verwoarkt, metaal bewoarkt, verpakkingsmateriaaln maakt, reaizen oawer de hele wearld anbeedt, transportbedriewn en hele moderne bedriewn dee ’t diensen verrichet vuur aandere oondernemmingn.

Froai stimuleern
Umdet oonze gemeente an de A1 lig én an de vuurname spoorliene Randstad-Duutslaand is det nen extra anjager vuur de economische ontwikkeling. Doarbiej haank d’r een gezoond oondernemmersklimaat: gin goold zo good! Zaaknleu dee ’t met wat niejs weelt beginn zut de gemeente heel geane komn en weelt ze ook geane helpen. Startnde oondernemmers köant trechte in ene van de veer startershaln dee-j köant veendn op de veer bedriewnterreinen in Riessen en Hooltn woer ‘t alns oet de kiek eregeld is. Is ’t een woonder det ‘r in oonze gemeente heel weainig leu biej de dure loopt?

Plezerig weenkeln
D’r is heel wat te koop in oonze gemeente en doarumme wordt ‘r ook zo völ eweenkeld. De gemeudelijke wonkernen, weenkels vuur netzelfde wa-j zeukt, gratis ’n auto toozetn, de actieve weenkeleersverenigingn: met det soort dinge krie-j vanzelf det de leu oet de hele strekke geane komt um boskopn en inkoopn te doon. Iej treft ‘r de grote laandelijke weenkels mear ook nen heeln hoop kleanere, plaatselijke zaakn. De gezellige moarktn op moandag, vriejdag en zoaterdag maakt ’t helemoals óf. En alle joar is d’r broaderie, zeent ‘r rommelmoarktn, koopzoaterdagoawnde, ’t startfeest van ’n Triathlon Hooltn en de bekeande Keunefeestn. Doar koomp aaltied wier nen hoop plezerig volk op of.

Mooi wonn
A-w in oonze gemeente kuijert oawer wonn, dan dreejt alns um ruumte, ofwisseling en veailigheaid. In de verschilnde nieuwbouwwiekn stoat wonningn vuur alle soortn leu. Doarumme zeent de wiekn nit eenvormig, mear d’r zeent ofwisselnde bewonnersgroepn. Biej niej bouwplann besteade viej nen hoop andach an greunigheaid roond de huze, mear det doo-w ook vuur de wonningn dee ’t in en biej het centrum stoat. Zo krie-j ’n good eawenwich tusken röste en beweaging. Doarbiej slot dit greune karakter good an biej de natuurlijke umgewing.

Plezerig leawn
Wongenot steet nooit op zikzelf mear hef alns van doon met oe good veuln en de meugelijkheaid van ‘n angenaam leawn. At ’t geet oawer walbeveendn hef oonze gemeente nen hoop in te beedn. Nen heeln hoop sport-, cultuur- en aandere verenigingn zorgt vuur de neurige ontspanning en contactn met aandere leu. Wat ’t oonderwies angeet is d’r een roem  anbod van instellingn met alle leawensbeschouwelijke kluurn. Um oonze börgers ’t leawn zo angenaam meugelijk te maakn, steet de leefboarheaid biej oons strak op ’n agenda. Het is van belang det oonze börgers, mear ook oonze gäste, in ne veailige umgewing köant wonn, woarkn en ontspann. Doarumme he-w zo völle andach vuur verkeersveailigheaid, oopnboare orde, persoonlijke veailigheid en ’t handhaawn van de geeldende regels.

In alle röste bewoondrn
De gemeente Riessen-Hooltn hef nen hoop bezeensweardige dinge. Ene van de bekeandsten is toch wal de oalde Scheeldkoarke den ’t stamt oet ’t joar 755! Ook he-w oonze Pelmölle, ne stellingmölle den ’t tot 1925 in gebroek is ewes as ölliesleagerieje. Oostelijk van ’t stadshatte kö-j het historische Parkgebouw van Riessen veendn. Met op ne smetteweagns de havezate ’n Oosterhof woer ’t Riessens Museum in zit. In 2003 is doar ’t eerste en ’t ennigste internationale Brandweermuseum lös-egoan. De mölle De Hegeman is ene van de bezeensweardige dinge in Hooltn. Doarnöast he-j d’r ook het OAD-museum (krek joa, van de OAD-reaizen), de Oudheidkamer in het oalde gemeentehoes en ’t museum Natuurdiorama op ’n Hoolterboarg.

Hearlijk tot oezelf komn
Wee ’t hooldt van de natuur kan in de gemeente Riessen-Hooltn zin harte ophaaln. Iej hebt schilderachtig netuurgebeedn as ‘t Hollaands Schwarzwald, ’n Riessensen Boarg, ’t Riessense Veeld en de Ravijntjes. Mear ‘n échn poarel in de krone is ’t Nationale Park de Sallaandse Heuwelrugge. Dit park is ’n oetgestrekt natuurlaandskop woer heed, loofbuske, zaandverstoewingn en noalnbeume mekoar ofwesselt in ’n kluurnspel woe-j ’n oadm van inhooldt. ’t Löt zich begriepn det de dag- en verbliefrecreatie ne vuurname plaatse hebt in oonze gemeente. Campings, hotels, vekaansiebungelo’s: iej valt ‘r oawer, mear dan zoonder da-j d’r oe an stoot. Beweaging en gastvriejheaid magnt dan absoluut biej oonze gemeente heurn; de röste van oonze natuur wille viej nit missen.


Gemeente Riessen-Hooltn

Bezeukadres
‘n Scheeld 1 Riessen

Posadres
Posbusse 244  7460 AE Riessen

t (0548) 854854
f (0548) 854855
e gemeente@rijssen-holten.nl
w www.rijssen-holten.nl

Met Mijn Rijssen-Holten kunt u als ondernemer direct gebruikmaken
van een aantal extra diensten van de gemeente.

In de nabije toekomst is deze service ook beschikbaar voor burgers

Inloggen voor ondernemers